6 ԲԱՆ, ՈՐ ԱՐԺԵ ԻՄԱՆԱԼ ՄԻՆՉԵՎ ԱՄՈՒՍՆԱՆԱԼԸ

Երբ մինչև ականջներիդ ծայրը սիրահարված ես, ամուսնությունը թվում է դուռ՝ անսահման ու անվերջ երջանկության համար: Եվ միայն ամուսնական համատեղ կյանքից հետո են բացահայտվում ամենակարևոր ճշմարտությունները: Ահա թե որոնք են դրանք:

8891
6 ԲԱՆ, ՈՐ ԱՐԺԵ ԻՄԱՆԱԼ ՄԻՆՉԵՎ ԱՄՈՒՍՆԱՆԱԼԸ

ԳՈՅՈՒԹՅՈՒՆ ՉՈՒՆԻ ԱՆՎԵՐԱՊԱՀ ՍԵՐ ԶՈՒԳԸՆԿԵՐՈՋ ՀԱՆԴԵՊ

Ձեր ամուսինը ձեր երեխան չէ, այլ հասուն մարդ, ում հետ դուք որոշել եք անցկացնել ձեր կյանքը: Բայց մարդիկ փոխվում են ամեն օր, ամեն ամիս ու տարի: Ձեր ամուսինը միշտ դուր չի գա ձեզ, բայց դուք միշտ կսիրեք նրան: Դուք կարող եք լինել երջանիկ զույգ, երջանիկ ընտանիք, անգամ եթե այդ պահին դժվար ժամանակներ են, ու սերը դուրս չի հորդում ձեր սրտերից:

Ամենակարևորն այն է, որ հիշեք. ոչ ոք պարտավոր չէ սիրել ձեզ հենց այնպես: Եվ դուք նույնպես պարտավոր չեք: Դուք պետք է ջանք թափեք, օգնեք ձեր զուգընկերոջը, որ նա սիրի ձեզ, նույնիսկ և հատկապես ամուսնությունից հինգ, տասը, տասնհինգ տարի անց:

ԱՄԵՆԱԾԱՆՐԸ ԵՐԵԽԱՅԻ ԾՆՈՒՆԴԻՑ ՀԵՏՈ ԱՌԱՋԻՆ ԵՐԿՈՒ ՏԱՐԻՆԵՐՆ ԵՆ: ԹՈՒՅԼ ՄԻ ՏՎԵՔ, ՈՐ ԴՐԱՆՔ ԴԱՌՆԱՆ ՕՐԻՆԱԿ ՀԵՏԱԳԱ ՈՂՋ ԿՅԱՆՔԻ ՀԱՄԱՐ

Այո, երեխաները երջանկություն են, և անգամ եթե դուք ամբողջ կյանքում երազել եք ծնող դառնալու մասին, միևնույն է, երեխայի ծնունդից հետո ամեն ինչ փոխվում է: Ձեր կենցաղը, առօրյան, շփման միջոցները, խնդիրները հաղթահարելու միջոցները՝ ամեն ինչ գրողի ծոցն է թռչում: Մարդիկ ասում են. «Պետք է հարաբերություններն առաջին տեղում դնել»: Այո, եթե դա անելով՝ չեք զոհաբերում երեխայի երջանկությունը:

Բայց որքան էլ դուք ջանք թափեք, միևնույն է, դժվար է լինելու: Փոխվելու է ձեր մտածողությունը, մարմինը, դուք քնի պակաս եք ունենալու: Ամենակարևորն այն է, որ թույլ չտաք, որ այս շրջանը որոշի ձեր վերաբերմունքը ձեր ամուսնու հանդեպ: Թույլ մի տվեք վիրավորանքին կամ բարկությանը կուտակվել, խոսեք, մարզեք ձեր համբերությունը, միշտ հիշեք, թե ինչպես եք սիրահարվել այդ մարդուն, խնդրեք և ընդունեք մտերիմների օգնությունը: Արեք առավելագույնը, որպեսզի այս շրջանը կարողանաք հաղթահարել նվազագույն կորուստներով:

ՄԻՇՏ ՉԷ, ՈՐ ՍԵՔՍԸ ԼԻՆԵԼՈՒ Է ԱՌԱՋԻՆ ՏԵՂՈՒՄ

Մինչև ամուսնանալը թերևս դա դժվար է պատկերացնել, բայց որքան էլ դա հիասթափեցնող հնչի՝ երկարաժամկետ հարաբերությունների մեջ այն իսկապես առաջին տեղում չէ, և կլինեն ժամանակներ, երբ զույգի ցանկությունները ոչ միշտ կհամընկնեն: Հնարավոր չէ այնպես անել, որ ցանկությունն առաջանա երկուսի մոտ՝ միշտ և միաժամանակ: Սակայն մտերմության պակասը ու հարաբերությունների սառչելը ընդհանուր խնդիր է, և դրան պետք է մոտենալ հասկացողաբար:

Ցանկությունը մեծացնելու ուղղությամբ կարելի է և պետք է աշխատել, սակայն կան շատ այլ միջոցներ, որոնց օգնությամբ դուք կարող եք պահպանել հարաբերությունների ջերմությունը, սեր ու քնքշանք արտահայտել միմյանց հանդեպ: Համբույրները, գրկախառնությունները, օրվա ընթացքում ջերմ հպումները, միասին համեղ բան պատրաստելը, գրկախառնված ֆիլմ դիտելը, այս ամենը նույնպես չափազանց կարևոր է:

ԱՄԵՆՕՐՅԱ ՀԱՃԵԼԻ ՄԱՆՐՈՒՔՆԵՐԸ՝ ՈՐՊԵՍ ՄՇՏԱՊԵՍ ԱՇԽԱՏՈՂ ՄԻՋՈՑ

6 ԲԱՆ, ՈՐ ԱՐԺԵ ԻՄԱՆԱԼ ՄԻՆՉԵՎ ԱՄՈՒՍՆԱՆԱԼԸ
Խոսքը միայն ծաղիկների մասին չէ: Հաճելի մանրուքների թվում են կողակցին մշտապես ջերմությամբ ու սիրով դիմելը (անունով կամ այնպես, ինչպես նրան դուր է գալիս), հաճոյախոսություններ անելը, նրա սիրելի թխվածքաբլիթը պատրաստելը կամ գնելը, նրա ներկայությամբ, միասին անցկացրած ժամանակով ուրախանալը և այլն, և այլն: Այսպիսի պահերով լեցուն ամուսնական կյանքը երջանիկ կյանք է: Այնպես որ, եթե ձեր մտքին որևէ ռոմանտիկ գաղափար է գալիս, անպայման իրագործեք այն, մի արգելակեք ինքներդ ձեզ: Այդ ամենը միանշանակ դրական ազդեցություն է ունենում:

ՄԻ ԴԱՐՁԵՔ ԱՅՆ ՄԱՐԴԸ, ՈՎ ՊԱՏՐԱՍՏ ՉԷ ԱՇԽԱՏԵԼ ՀԱՐԱԲԵՐՈՒԹՅՈՒՆՆԵՐԻ ՎՐԱ

Որքան էլ զույգի մեջ մեկը ջանք թափի, փորձի վերականգնել հարաբերությունները, փորձի փոխվել ու ավելի լավը դառնալ, ամուսնությունը չի փրկվի, եթե մյուսը նստում է ձեռքերը ծալած ու ոչինչ անել չի ուզում:

Երկար ու երջանիկ են այն միությունները, որտեղ երկուսն էլ ջանք են գործադրում այն պահպանելու, ամրացնելու ուղղությամբ: Իհարկե, երբեմն անհրաժեշտ է ժամանակ տալ զուգընկերոջը, որպեսզի նա կողմնորոշվի ու հասկանա ամեն ինչ և կարողանա «հասնել ձեր հետևից»: Երբեմն ձեզնից մեկն ավելի շատ ջանք կթափի, երբեմն՝ մյուսը, կարևորն այն է, որ ընդհանուր հաշվով ձեր ջանքերը հավասար լինեն, որովհետև նավակը առաջ չի շարժվի, եթե երկու թիակն էլ չաշխատեն:

ԵՐԲԵՔ ՄԻ ՎԻՃԵՔ ԱՅՆ ՀԱՐՑԻ ՇՈՒՐՋ, ԹԵ ՈՒՄ ԴԵՐՆ Է ԱՎԵԼԻ ԿԱՐԵՎՈՐ՝ ԳՈՒՄԱՐ ԱՇԽԱՏԵԼԸ, ԹԵ ԵՐԵԽԱՆԵՐԻՆ ՄԵԾԱՑՆԵԼԸ

Ինչ էլ որ դուք անեք, որքան էլ ձեզ համար դժվար լինի, միշտ հիշեք, որ ձեր զուգընկերն անում է շատ ու շատ բան, որը դուք պարզապես չեք տեսնում: Պարզապես մի սկսեք այդ վեճը: Այստեղ չկա մրցանակ կամ հաղթող, սա մրցույթ չէ, այստեղ երկուսն էլ ի վերջո պարտվում են:

Կարելի է և պետք է բաժանել պարտականությունները: Կարելի է և պետք է օգնել կնոջը երեխաների խնամքի հարցում, երբ կա ժամանակ: Կարելի է և պետք է աշխատել ու օգնել ամուսնուն, երբ երեխաների տարիքը թույլ տա դա: Գնահատեք ձեր կողակցի աշխատանքն ու ջանքերը, ինչպիսին էլ որ դրանք լինեն: Մի մոռացեք շնորհակալ լինել:

Աղբյուր

Այս հոդվածում՝


Միանալ զրույցին