ՊԱՐՏՈՒԹՅՈՒՆՆԵՐԻ ԱՌԱՎԵԼՈՒԹՅՈՒՆԸ. ՋՈԱՆ ՌՈՈՒԼԻՆԳԻ ՀԱՋՈՂՈՒԹՅԱՆ ՊԱՏՄՈՒԹՅՈՒՆԸ

Երիտասարդ հրաշագործ Հարրի Փոթերի մասին առաջին գրքի հրատարակումից առաջ հրատարակիչները նրան առաջարկեցին թողնել անվան սկզբնատառերը, քանի որ կին հեղինակի աշխատանքը կարող էր վախեցնել տղամարդկանց լսարանին: Գրքի վրա հայտնվեց միայն J.K.Rowling գրառումը: Սակայն երբ գիրքը տարածվեց ամբողջ աշխարհում և միլիոնավոր օրինակներով տպագրվեց, ոչ ոք արդեն սեռական պատկանելության մասին չէր էլ մտահոգվում: Մարդիկ միայն սպասում էին պատմության շարունակությանը…

Ջոան Ռոուլինգը գրում է վաղ մանկությունից: Իր առաջին հեքիաթը պարոն Ճագարի և տիկին Մեղվի մասին գրել է փոքրիկ քրոջ խնդրանքով՝ 5 տարեկանում: Վաղ տարիքում արդեն պարզ էին նրա հետաքրքրությունները՝ գրականություն և լեզուներ: Դպրոցում նրա աշխատանքները կարդում էին ամբողջ դասարանի առաջ, բայց, միևնույն է, նա մեծանում էր ամաչկոտ ու ներամփոփ, և դասընկերները նրան հիշում էին որպես աղջիկ, որ ապրում է իր երևակայական աշխարհում և անընդհատ գրառումներ է անում տետրերի մեջ:

Երբ Ջոանը 15 տարեկան էր, նրա մայրը հիվանդացավ ցրված սկլերոզով և 10 տարի պայքարելուց հետո մահացավ: Այս ողբերգությւոնը ծանր հետք թողեց գրողի հոգում.

«Ամենից շատ ես ցավում եմ այն բանի համար, որ մայրս այդպես էլ չիմացավ, որ ես ի վերջո գրող դարձա: Ես նրան ոչինչ չեմ պատմել Հարրի Փոթերի մասին, սակայն, վստահ ե, որ մայրս շատ կհավաներ նրան»,- պատմում է Ջոան Ռոուլինգը Օփրա Ուինֆրիի հետ հարցազրույցում:

Մոր մահից հետո Ջոանը որոշեց կյանքը սկսել մաքուր էջից և մեկնեց Պորտուգալիա՝ անգլերեն դասավանդելու: Այստեղ նա ծանոթացավ իր առաջին ամուսնու հետ: Ամուսնությունից մեկ տարի անց ծնվեց նրանց աղջիկը՝ Ջեսսիկան, իսկ ևս մի քանի անց ամուսինը նորածին երեխայի հետ Ջոանին դուրս արեց տնից:

Առանց գումարի, առանց աշխատանքի և ընտանիքի Ջոանը վերադարձավ Մեծ Բրիտանիա: Հոր հետ Ջոանը չէր շփվում մոր մահվանից հետո, հարազատներից նրա կողքին էր միայն կրտսեր քույրը՝ Դին: Ջոանն աղջկա հետ ապրում էր 70 ֆունտ նպաստով, որը հազիվ բավարարում էր փոքրիկ բնակարանի վարձը վճարելու և ամենէժան սնունդը գնելու համար:

«Ես ինձ համարում էի աշխարհի ամենամեծ անհաջողակը, որին առհասարակ հնարավոր էր գտնել ամբողջ աշխարհում»,– հիշում է Ջոանը: Ամուսնալուծությունը նրա հոգեկան աշխարհի վրա ծանր հետք էր թողել, Ջոանի մոտ խորը դեպրեսիա էր սկսվել:

Սակայն հենց այս դժբախտություններն էին, որ դարձան Հարրի Փոթերի գրքերի բանալին: Դժվար է հավատալ, որ այն գրողը, ով այսօր աշխատում է £77 մեկ րոպեում, համաձայնել է Հարրի Փոթերի մասին իր առաջին գրքի համար կանխավճար ստանալ ընդամենը £1500 (~$2300):

Bloomsbury ընկերությունը 13-րդ հրատարակչությունն էր, որին դիմել էր Ջոանը գրքի հրատարակման համար: Նախկին 12-ը մերժել էին նրան, իսկ Bloomsbury-ն համաձայնեց միայն այն պատճառով, որ հրատարակչության տնօրենի 8-ամյա աղջիկը՝ Ալիսա Նյուտոնը, կարդացել էր գրքի առաջին գլուխը և հայրիկից շարունակությունը պահանջել:

Ջոանի համար դա արդեն իսկ հաղթանակ էր: Եվ չնայած որ գիրքը հրատարակվեց ընդամենը 1000 օրինակով, որից 500-ը հրատարակիչը անվճար ուղարկեց գրադարաններ, «Հարրի Փոթերն ու փիլիսոփայական քարը» գիրքը ճանաչվեց Տարվա լավագույն մանկական գիրք Մեծ Բրիտանիայում:

ԱՄՆ-ում գրքի հրատարակման իրավունքները աճուրդում վաճառվեցին $100 000-ով: Ջոան Ռոուլինգը ամբողջությամբ կենտրոնացրեց իր ուժերը գրքի հաջորդ մասերի վրա և 2004 թվականին դարձավ Մեծ Բրիտանիայի ամենահարուստ կինը:

Գրքի իրադարձությունները հորինված աշխարհում են տեղի ունենում, և այստեղ բարին ոչ միշտ է հաղթում չարին, սակայն գրքերը անհետանում են գրախանութներից վայրկենական արագությամբ՝ 7000 օրինակ 1 րոպեում: 2011 թվականին Ջոան Ռոուլինգը դարձավ առաջին կին գրողը, ով աշխատեց 1 միլիարդ դոլար իր ստեղծագործությունների միջոցով:

Այդ ժամանակներից հետո նա էլ չի հայտնվել միլիարդատերերի ցանկում, քանի որ իր եկամուտների մեծ մասը նա ուղղում է բարեգործությանը: Նա Volant Charitable Trust բարեգործական ընկերության հիմնադիրն է: Հիմնադրամը պայքարում է աղքատության դեմ, օգնում երեխաներին և ոչ ամբողջական ընտանիքներին, ինչպես նաև մարդկանց, ովքեր տառապում են ցրված սկլերոզով:

2015 թվականին Ջոանը դարձավ 50 տարեկան: Նա ներառված է Աշխարհի ամենաազդեցին կանանց հարյուրյակում և 2015 թվականի ամենաբարձր վարձատրվող գրողների ցանկում զբաղեցրել է 7-րդ հորիզոնականը:

Հարրի Փոթերի առաջին գրքի հրատարակումից հետո անցել է 18 տարի: Գրքի առաջին տպաքանակից մնացած գրքերը այսօր վաճառվում են ավելի քան $30 000-ով: Ռոուլինգն արդեն հրատարակել է գրքի 9 սերիա, շարքը դարձել է աշխարհի ամենավաճառվող պատմությունը՝ իր տեղը զիրջելով միայն Աստվածաշնչին, իսկ կինոտարբերակը՝ ճանաչվել է երկրորդը՝ բոլոր երկրներում հավաքված գումարի արդյունքով ($7,723 միլիարդ 8 ֆիլմի համար): Հարրի Փոթերի բրենդը գնահատվում է 15 միլիարդ դոլար: Ջոանը շարունակում է գումար աշխատել նաև գրքի էլեկտրոնային տարբերակից. ի դեպ, նա միակ գրողն է, ով կարողացել է հրատարակիչներից ստանալ իր ստեղծագործության էլեկտրոնային տարբերակի վաճառքի իրավունքը:

Նա ստանում է եկամուտ ոչ միայն գրքի սերիաների վաճառքից, այլև այն կոմերցիոն նախագծերից, որոնք այս կամ այն կերպ կապված են Հարրի Փոթերի հետ՝ ֆիլմերի հեղինակային հոնորարներ, հերոսների պատկերով արտադրանքից ստացվող գումարներ և այլն: Հրաշագործ տղայի մասին պատմությունները ընդհանուր հաշվով հեղինակին բերել են £545 միլիոն (ավելի քան $1 միլիարդ):

Հարրի Փոթերի գրքերը Ջոան Ռոուլինգի միակ հաջողված աշխատանքը չէ: 2012 թվականին նա տպագրեց «Պատահական թափուր հաստիք» վեպը՝ նախատեսված դեռահաս ու չափահաս տարիքի ընթերցողի համար: Գրքի համար նրան տրված կանխավճարը կազմեց $8 միլիոն: Վաճառքի առաջին 3 օրերին գրքի վաճառված օրինակների թիվը անցավ 1 միլիոնը:

Ավելի ուշ Ջոանը որոշեց հանդես գալ տղամարդու կեղծանունով և ևս երկու գիրք հրատարակեց՝ «Կկվի կանչը» և «Շերամ», և թեև երկրորդ վեպի հրատարակումից առաջ ճշմարտությունն ի հայտ եկան, Ջոանը շարունակեց հանդես գալ այդ անունով՝ Ռոբերտ Գելբրեյթ:

2008 թվականին Հարվարդի համալսարանի շրջանավարտների առջև ելույթ ունենալով՝ Ջոանը պատմում էր նրանց այն մասին, որ միշտ չէ, որ ստացվում է հենց առաջին փորձից.

«Ձեր տարիքում ինձ ամենից շատ աղքատությունը չէր անհանգստացնում, այլ անհաջողության մատնվելը: Պետք չէ վախենալ անհաջողություններից, դրանք անխուսափելի են: Հնարավոր չէ ապրել և չպարտվել: Թերևս դա հնարավոր է միայն այն դեպքում, եթե դուք ապրում եք այնքան զգույշ, որ ըստ էության կարելի է ասել, չեք ապրում առհասարակ: Իսկ այդ դեպքում դուք միանշանակ անհաջողության եք մատնվում»:

Աղբյուր